العيد عنا أحلى

كل عام و انتو بألف خير يا رب و ينعاد عليكم بالصحة و السلامة، همه بس اكم مشكلة انا بعاني منهم بالعيد و اظن انو مو بس انا، كل الشعب الاردني اقوللك بلاش نعمم نص الشعب بكره العيد لأنو النصف الثاني من الشعب مش معطي مجال للواحد انو ينبسط او يعمل اي اشي زي:

١. الأزمة:

أنا بس بدي افهم شغلة وحدة، اذا كل الناس طالعة و كل الناس بالشارع طب كيف بزوروا بعض؟! -_- و اللي بعجبني اكتر السيارات السياحي اللي بتكون معبية الشوارع و اللي بسوقها بكون عمروا ١٧ يمكن و مفكر حالو بلعب GTA!! يعني ما بعرف عنك بس انا و الله حابة اعيد و مو حابو اموت هيك موتة! بعدين شو قصة التزمير هاي؟ يعني بدو يكون في مجال معنا انا نمشي بس احنا ما بدنا!

٢. العجقة الغريبة في المولات:

ليش الناس بتموت عالمول بالعيد نفسي افهم؟ مرة وحدة جربت اروح على مكة مول اول ما فتح بالعيد، رحنا و ما رجعنا! و بتكون السيارات حتى صافة على رصيف الڤيلات اللي حوالين المول!!

٣. مين دول؟! :/

في ناس ما بتشوفهم غير مرتين عيد الفطر و عيد الاضحى و كل مرة نفس الاسئلة مع اختلاف بسيط جداً بس نفس نغاشة كل مرة و التعليقات نفسها! و بستغربوا اذا ما عرفتهم كمان انو "بتتزكريني حبيبتي انا اللي شفتيني بعرس ابن خال عمة اخت سلفة جارة صاحبة امك اللي بالكويت!" احسبها انت بقى -_-

٤. ضيافة العيد:

أنا بالنسبة الي ضيافة العيد تعذيب! يعني اذا كل بيت بصّر انك تشرب و تاكل و تتغدا و ترجع كمان مرة تشرب هاي مصييييبة! و خصوصاً اذا كانت الضيافة من هاد المعمول اللي قد الصحن بكون، هاي نفس الحبة بضل تلف معاك طول ايام العيد...او المعمول اللي بترمي عالحيط و ما بصير في اشي 0_0

بس هاي الاشياء على ما اعتقد اللي بترفعلي ضغطي بالعيد! انتو شو بدايقكم؟! ولا انتو العيد عندك Perfect؟؟ p: