ليش ما بحضر تلفزيون برمضان؟!

مع نهاية شهر رمضان انتهت المسلسلات و طبعا الناس ما بتلحق, مسلسل مصري من هون و سوري من هناك.....إلخ!
أنا مني و علي ما تابعت اشي بس بكون قاعدة مع أهلي و بتكون قعدة قطايف و بكون التلفزيون شغال أكيد يا عال Mbc أو Melody Drama! بس حبيت أحكي رأي باللي شوفتو و هو كالتالي:


زهرة و أزواجها ال 100000:

صراحة أنا ما حضرت هالمسلسل إلا عشان أغنيته لأنو ولا حدا في بنطاق! و خصوصا لما زهرة تصير تدلع! يعني كل هالجهامة و الطول و العرض و آل بتدلع! و لا اللبس و المكياج هدول لحالهم بدهم صفحة كاملة, الوحدة أول ما تصحى من النوم ماشاء الله على هالجمال و العنين و الشعر مش انو بنكون عايفين حالنا و الباقي عندكو....!
و الكعب العالي اللي مع كل اشي و في كل مكان و بأي وقت يعني لو يتكون رايحة تلعب رياضة ما أظن عندها مانع تلبس كعب.
و أحلى اشي عال facebook بكون مكتوب شغلات سخييييفة بس عنجد بضحك زي متلا: هل اصابت عين الحسود غادة عبد الرازق (و أنا مالي و مالها!!) , ما رأيك بمكياج الممثلة غادة في مسلسلها زهرة؟!......الخ.

مشان الله عايزة أتجوز:

هاد اكتر مسلسل ضرب على عصبي لأنو هند صبري أبدا ما عرفت تمثل كوميدي (أكيد الشباب ما بيفرق عندهم تمثيلها) بس كتير كانت تبالغ في ردة الفعل يعني كان يضرب عالعصب لدرجة اني اتنرفزت منها و الصوت كان Mute!

باب الحارة الجزء المليون:

يعني مافي كتير انتقادات عليه بس انو ماشاء الله المخرج أبدع بالقصة! لدرجة انو مفكرنا هنود (بخصوص عودة أبو عصام اللي ما شفنا) و جوازة عصام التالتة و كيف بقدرة قادر صارو صحبات و بحبو بعض نسوانو التلاتة! و احنا ما كنا عارفين ابدا انو كل اشي بصير بآخر حلقة, انا صراحة عرفت من برضو الFacebook:
كانو يضلو يكتبو شاهدو المشهد الأخير"فريال تقتل مأمون...إلخ".

العار:

ما حضرت غير حلقة وحدة و فهمت كل اشي مين العاطل و مين المنيح و في سؤال محيرني من أول ما شفت حلقة منو و أنا أتسائل انو شو بالنسبة لشعر علا غانم اللي زي عدم المؤاخذة الظربان؟

أما بالنسبة للدعايات فهاي موضوع تاني! بعدين بنحكي فيه!
لسه في كتير بس صراحة تعبت لأنو لو تشوفو كيف بكتب! ما عندي أحرف عربي ف عم بستعمل كيبورد google يعني عم بكتب بالماوس!
~~٠٠ هذه الآراء لا تعبر الا عن آراء صاحبها و يا ريت ما حد يزعل ازا كنت حكيت اشي غلط عن مسلسل الوالد أو الوالدة ~~٠٠